Nga Boldnews.al
Në orën 18 të së Mërkurës, Këshilli i Mandateve dhe Imuniteteve në Parlamentin e Shqipërisë do të mblidhet për të diskutuar mbi kërkesën e Prokurorisë Speciale, SPAK, për dhënien e autorizimit për arrestimin e deputetit socialist, Alqi Bllako.
Prokuroria dyshon se Bllako ka kryer veprat penale të korrupsionit dhe shpërdorimit të detyrës gjatë procedurave për inceneratorët e Fierit dhe të Tiranës.
Kërkesa e nënshkruar nga drejtuesi i Strukturës së Posaçme Kundër Korrupsionit, SPAK, pritet të shqyrtohet nga 10 deputetë, 5 nga Partia Socialiste dhe 5 nga opozita.
“Boldnews.al” ka siguruar dokumentin e Sekretarit të Përgjithshëm të Kuvendit, i cili njofton anëtarët e Këshillit të Mandateve dhe Imuniteteve për mbledhjen e së Mërkurës.
Këshilli i Mandateve drejtohet nga kryeparlamentarja Lindita Nikolla. Anëtarët socialistë janë Klotilda Bushka, Ermonela Felaj, Arben Pëllumbi dhe Taulant Balla.
Ndërsa nga ana e opozitës, anëtarë të Komisionit të Mandave dhe Imuniteteve janë deputetët Enkelejd Alibeaj, Gazmend Bardhi, Ervin Salianji, Greta Bardeli dhe Saimir Korreshi.
Në bazë të Rregullores së Parlamentit, Këshilli i Mandateve duhet të votojë me shumicë të thjeshtë votash në favor të kërkesës së Prokurorisë për arrestimin e deputetit.
Në rast se nuk arrihet shumica, kërkesa rrëzohet. Ndërsa, nëse Këshilli i Mandateve jep konfirmimin, kërkesa më pas votohet në seancë plenare.
