Një 42-vjeçar në Durrës është arrestuar ditën e sotme pasi akuzohet se ka ushtruar dhunë ndaj bashkëshortes së tij dhe e ka kërcënuar me thikë.
Policia bën me dije se ka qenë bashkëshortja e cila ka bërë denoncimin se dhunohej nga partneri.
“Shërbimet e Stacionit të Policisë Plazh, pas kallëzimit të marrë nga shtetasja J. Sh. se bashkëshorti i saj e dhunonte vazhdimisht dhe e kishte kanosur me armë të ftohtë (thikë), kanë organizuar punën për kapjen e autorit të dyshuar”, njofton policia.
Shtetasi F.SH. do përballet me veprat penale “Dhuna në familje” dhe “Prodhimi dhe mbajtja pa leje e armëve të gjuetisë dhe sportive”.
Gjatë kontrollit të ushtruar në banesën e tij, shërbimet e Policisë kanë gjetur një armë sportive (pushkë), e cila u sekuestrua së bashku me thikën, në cilësinë e provës materiale.
