VIP-at e pranishëm dhe të gjithë shikuesit e ceremonisë së 94-të të “Oscars” u shokuan gjatë skenës ku Will Smith goditi Chris Rock-un në mes të shfaqjes si rrjedhojë e shakasë që ky i fundit bëri lidhur me flokët e gruas së tij, e cila vuan nga një sëmundje që i shkakton rënien e tyre.
Lidhur me këtë situatë që tronditi të gjithë rrjetin, ka reaguar edhe gazetari e prezantuesi Blendi Salaj i cili shprehet se e ka dashur shumë Will Smith dhe i vjen keq që u desh të ishte ai që dha një shembull dhune para syve të gjithë botës.
Mes të tjerash ai shkruan se ai nuk u tregua një burrë i vërtetë, pasi një i tillë i zgjidh konfliktet me fjalë, jo me arrogancë, narcisizëm dhe dhunë.
“”Nuk bëhet shaka me sëmundjen e tjetrit, o fundërrinë!” – mund t’i kishte thënë dhe do ta linte Chris Rock si legen në mes të skenës, por jo. Willi e humbi, dhe pasi kishte qeshur me batutën, shembulli i miliona të rinjve dhe fëmijëve tregoi se problemet zgjidhen me dhunë – e pavërtetë në fakt.”- shkruan Salaj.
Postimi i plotë:
“E kam dashur Will Smith që kur ishte një princ i ri nga Bel Air dekada më parë dhe më vjen keq që u desh të ishte ai që dha një shembull dhune para syve të gjithë botës. Më vjen keq që në natën kur ai u nderua me çmimin më të lartë që një aktor mund të ëndërrojë, vëmendja shkoi tek “shuplaka e nderit” duke i prishur mbrëmjen vetes dhe gjithë fituesve të tjerë. Më vjen keq që Willi humbi vetëkontrollin prej një shakaje të shëmtuar.
“Nuk bëhet shaka me sëmundjen e tjetrit, o fundërrinë!” – mund t’i kishte thënë dhe do ta linte Chris Rock si legen në mes të skenës, por jo. Willi e humbi, dhe pasi kishte qeshur me batutën, shembulli i miliona të rinjve dhe fëmijëve tregoi se problemet zgjidhen me dhunë – e pavërtetë në fakt. Me atë veprim Will nuk tregoi gjë veçse dobësi mendore. Shakaja e Chris Rock ishte e ulët dhe jo, nuk është aspak ok të tallesh me një grua, ka dhe tek fjalët e tij mizogjini sa të duash. Rock duhe të kërkojë flaje publikisht. Ama njerëzit e poshtër ekzistojnë, njerëzit që tallen me trupat e të tjetëve ekzistojnë – pyetja është si merremi me ta? Çfarë shembulli u japim fëmijëve tanë për zgjdhjen e konflikteve? I nxisim të rrihen, të grushtohen, të theren?
Kishte shumë nga ata që e duartrokitën, shkruan se u tregua “burrë i vërtetë”. Por burrat e vërtetë i zgjidhin konfliktet me fjalë, jo me arrogancë, narcisizëm dhe dhunë. Vëmendja duhet të ishte tek Jada dhe problemi i saj, por kaloi tek egoja e Willit dhe shërben tani për të furnizuar me karburant racistët që po thonë, “punë zezakësh!”.
Will ka kërkuar falje publikisht tanimë duke thënë se dhuna e çdo forme është helmuese dhe se i vjen turp. Por ai moment i çmimit të parë Oscar nuk i vjen më. Në kujtimet e tij ai tregon sesi i ati ia rrihte nënën me grushta deri sa ajo villte gjak, këto përvoja e kanë lënë me plagë dhe janë ndoshta ato që e bënë të dobët kur duhet të tregonte forcën e karakterit.”- shkruan Salaj.
View this post on Instagram
