Kjo e Martë shënon ditën e 34 të luftës në Ukrainë.
Delegacionet ruse dhe ukrainase kanë mbërritur në Stamboll për bisedimet e para pas disa javësh. Ukraina thotë se prioriteti i saj është të negociojë një armëpushim, por SHBA dhe Ukraina kanë shprehur gjithashtu skepticizëm rreth synimeve të Rusisë.
Presidenti ukrainas Volodymyr Zelensky i kërkoi fuqive botërore që të ashpërsojnë sanksionet ndaj Rusisë, duke përfshirë një embargo të naftës.
BBC, duke cituar “burime të afërta” me miliarderin rus Roman Abramovich raporton se ai pësoi simptoma të helmimit në bisedimet e paqes në fillim të këtij muaji, së bashku me dy negociatorë ukrainas të paqes. Ai tani është shëruar.
Presidenti i SHBA, Joe Biden ka thënë se ai nuk do të “tërhiqet” nga komenti i tij se Vladimir Putin “nuk mund të qëndrojë në pushtet”.
Ministria e Mbrojtjes e Britanisë së Madhe beson se Rusia po ruan pozicione bllokuese, ndërkohë që rivendos forcat e saj.
Një zyrtar i lartë i mbrojtjes amerikane konfirmoi se Ukraina ka arritur të rimarrë qytetin e Trostyanets pranë rajonit verior të Sumy dhe se përparimi i Rusisë në Kiev ka ngecur mes një zhvendosjeje të fokusit drejt rajonit lindor të Donbasit.
/BN/
