Trajneri Edi Reja ka bërë disa ndryshime në rreshtimin e përfaqësueses shqiptare për ndeshjen ndaj Gjeorgjisë dhe zëvendëstrajneri Ervin Bulku, ka shpjeguar se pse janë bërë lëvizjet në rreshtim me 6 emra të rinj në krahasim me titullarët e Spanjës.
“Ndryshimet u bënë për t’i dhënë lojtarëve disa minuta dhe kohën e tyre që trajneri të ketë panoramë sa më të qartë kur të vijnë ndeshjet zyrtare. Të gjithë janë të barabartë dhe të gjithë do të kenë mundësinë të tregojnë vlerat e tyre.
Thjesht Asllani është lojtar i ri se të tjerët kanë luajtur nga minuta e parë edhe herë të tjera. Është bërë ndryshimi për freski të mesfushës, por edhe për të parë Asllanin, për të parë se si sillet kjo treshe. Trajneri, edhe pse i njeh mirë të gjithë, kur janë në ekipin dhe luajnë bashkë është ndryshe”, deklaroi ai për “SuperSport”, teksa shpjegoi edhe detyrat e Roshit.
“Roshi dihet që aftësitë më të mira janë në aspektin sulmues, do të shtyjë më shumë drejt sulmit, pa harruar në mbrojtje. Është skema 3-5-2 që preferon trajneri dhe duke parë lojtarët që ofrojnë këtë lloj skeme, mendoj se Roshi ka aftësi të jashtëzakonshme fizike, ka shpejtësi që e njohim dhe shpresojmë të na ndihmojë në krahun e djathtë sot”, tha Bulku.
