Prej ditës së premte, kur Gjykata e Tiranës vendosi të njohë Kuvendin e 11 dhjetorit 2021, në të cilin u miratuan ndryshimet statutore, si dhe u shkarkuan nga të gjitha funksionet partiake kupola drejtuese e PD, selia e kësaj partie është përfshirë nga ndryshimet.
Gjatë fundjavës janë hequr blindet e vendosura në dyert anësore dhe në brendësi të selisë, por edhe në pjesën e dritareve. Në total janë hequr 6 dyer të blinduara, ku secila prej tyre peshonte rreth 350 kg, ndërkohë që ka nisur edhe dorëzimi i zyrave të ish-drejtuesve të PD.
Nga raportimet mësohet se të parët që kanë dorëzuar zyrat e tyre janë Lulzim Basha dhe Jorida Tabaku, ndërsa pritet dorëzimi i zyrave nga Gazment Bardhi, i cili mbante postin e Sekretarit të Përgjithshëm, Enkelejd Alibeaj, i komanduar së fundmi edhe si Kryetar i PD, por edhe i Sekretariatit.
Basha raportohet se është zhvendosur në një zyrë te Torre Drini. Gjithashtu ka nisur edhe zëvendësimi i logove dhe simboleve, ku ato që përdoreshin më parë në PD do të zëvendësohen nga simbolet dhe logot e miratuara në Kuvendin e 11 dhjetorit.
Gjatë javës pritet një mbledhje e Grupit Parlamentar të PD, por nuk dihet nëse Enkelejd Alibeaj do të vijojë të mbajë funksionin e kreut të grupit.
