Këshilli i Lartë i Prokurorisë zgjodhi sot Alfred Ballën si kryetarin e ri të këtij institucioni. Alfred Balla ishte kandidati i vetëm për postin e kryetarit.
Në fjalën e tij gjatë mbledhjes së KLP, Balla kërkoi besimin e kolegëve për të drejtuar institucionin. “Mendoj se kam disa karakteristika që plotësojnë kriteret për këtë post”, u shpreh Balla, deri më tani kryetar i komanduar i KLP.
Kritikat nga kolegët nuk munguan, megjithëse votimi për zgjedhjen e tij si kryetar i ri ishte unanim.
Bujar Sheshi, anëtar i KLP-së, shprehu keqardhje për mungesën e garës. “Është një detyrë që kërkon përgjegjshmëri të lartë. E kam lexuar me vëmendje platformën tuaj. Por duhet përqendroheshit më shumë në të kaluarën e institucionit, në angazhimin tuaj në përmirësimin e tyre. Ju kishit një ftesë për ndryshimet ligjore që KLP duhet ti paraqiste kuvendit dhe nuk morët asnjë mendim nga anëtaret. Ne kemi bërë një rregullore dhe nuk i keni zbatuar këtë kohë që keni ushtruar këtë detyrë i komanduar. Ndihem i keq ardhur se sot mendoja se do kishim një garë”, tha ai.
Sokol Stojani, tjetër anëtar, tha se ka nevojë për ndryshime ligjore për mënyrën e zgjedhjes së kryetarit. “Ky këshill zgjati afatin me 3 javë për të patur kandidatura në mënyrë që të shihnim vizionin e kandidatëve. Gjatë kësaj periudhe morëm informacion se ishit liruar nga hetimi disiplinor i nisur 6 muaj me parë nga ILD. Do ishte mirë që të kishit identifikuar problemet në platformën tuaj. Ka nevojë për ndryshime ligjore për mënyrën e zgjedhjes së kryetarit”, tha ai.
Alfred Balla zëvendëson në postin e kryetarit të KLP-së Gent Ibrahimit, të cilit i mbaroi mandati.
