Të tjera detaje janë publikuar lidhur me ngjarjen e ndodhur mbrëmjen e së shtunës në Tiranë, ku u përfshi nga flakët Komisariati nr 5.
Si rezultat ka humbur jetën 26 vjeçari Arben Mici, person i ndaluar nga Policia, ndërsa janë lënduar edhe dy persona të tjerë, mes të cilëve edhe njv efektiv policia.
Mici, i arrestuar për dhunë në familje ka dalë para gjykatës penale të Tiranës ku është njohur me masën e sigurisë arrest me burg, dyshohet se është edhe autori i zjarrvënies.
Në masë sigurie arrest në burg është edhe 62 vjeçari Dilaver Idrizi, edhe ky i ndaluar për dhunë në familje, i cili ka mbetur i lënduar.
Por si ka ndodhur ngjarja?
Bazuar te dëshmitë e mbledhura nga grupi hetimor, flakët kanë përfshirë ambientet e paraburgimit, konkretisht në dhomën ku qëndronte 26 vjeçari.
Polici Hajredin Boja ka vrapuar dhe ka hapur derën, ndërsa ka tentuar të nxjerrë të riun. Por 26 vjeçari i ka shpëtuar nga duart efektivit dhe është futur në tualetin e dhomës ku ai qëndronte. Më pas kanë shkuar efektivët e tjerë të cilët kanë tentuar t’u japin ndihmë por s’kanë mundur për shkak të tymit.
Zjarrfikëset e kanë gjetur 26 vjeçarin të mbyllur në tualetin e dhomës së burgut, në gjendje të rëndë pasi ishte asfiksuar dhe me plagë në trup. Fatkeqësisht ai ndërroi jetë në spital.
Në lidhje me ngjarjen janë arrestuar 2 policë të komisariatit numër 5, Hajredin Boja 64 vjeç, i cili mbeti i lënduar teksa po tentonte të nxirrte të burgosurit, si dhe kolegu i tij Fatmir Isufi 64 vjeç. Nën hetim janë inspektorët Lutfi Muça 64 vjeç me detyrë Nd/specialist Informacioni në Komisariatin nr. 5; Mark Marashi 52 vjeç me detyrë Nd/specialist Informacioni në Komisariatin e Nr. 5 dhe Komisar Ylli Çollaku 44 vjeç me detyrë Shef i Seksionit të Patrullës së Përgjithshme në Komisariatin Nr. 5.
