Një shpërthim vullkani ka ndodhur këtë të shtunë në Filipine duke bërë që mijëra banorë të largohen nga shtëpitë e tyre.
Mediat e huaja bëjnë me dije se shpërthimi i vullkanit Taal që përhapi hi dhe avull në qindra metra lartësi ka rritur panikun tek qytetarët.
Vullkani Taal, i cili ndodhet në një liqen piktoresk në jug të Manilës, pati një shpërthim “të shkurtër” në orën 7:22 të mëngjesit, tha në një deklaratë Instituti Filipin i Vullkanologjisë dhe Sizmologjisë.
Ai paralajmëroi se shpërthime të mëtejshme ishin të mundshme, për të cilat tha se mund të shkaktonin rrjedha të rrezikshme vullkanike me lëvizje të shpejtë të gazit, hirit dhe mbeturinave, si dhe një cunami.
Banorët e pesë vendbanimeve përreth liqenit u urdhëruan të largoheshin nga shtëpitë e tyre, në evakuimin e tretë masiv në tre vitet e fundit rreth një prej vullkaneve më aktivë të vendit.
Ndërkohë shefi i agjencisë sizmiologjike, Renato Solidum, tha se aktiviteti ishte më i dobët se në janar 2020, kur Taal hodhi hi në 15 kilometra lartësi dhe hodhi lavë të nxehtë, duke shkatërruar shumë shtëpi, duke vrarë bagëti dhe duke dërguar dhjetëra mijëra persona në strehimore.
“Nuk ka asnjë kërcënim përtej… pesë fshatrave,” tha Solidum.
