Edi Reja ka qenë i pakënaqur për faktin se si skuadra e tij nuk ka qenë e vëmendshme deri në fund në ndeshjen ndaj Spanjës. Trajneri i kuqezinjve tha për “SuperSport” pas humbjes, se ekipi vazhdonte të bënte dhurata.
“Me pak më shumë vëmendje do të merrnim rezultat që do të na shërbente ne dhe djemve se kanë shpenzuar shumë energji. Kemi punuar shumë në fazën mbrojtëse me tre që dilnin para te mesfushorët e tyre. E kemi dhuruar golin e parë se nuk mund të pësohet ashtu, me pak vëmendje mund të merrnim rezultat. Kemi pësuar për faje tona, nuk arrijmë të bëjmë këtë hap para e tregojmë që jemi skuadër e ndërgjegjshme, me vëmendje. Duhet të ndryshojë mentaliteti, nuk mund të dhurojmë gjithmonë, se këto janë dhurata. Sigurisht Spanja është ekip i madh, luan shumë mirë. Ne arritëm të bënim disa gjëra, jo siç e planifikuam me kundërzbritje siç mendonim. Por duhej të bënim këtë ndeshje, se me Spanjën e dimë që janë të aftë, në veçanti na mungojnë detajet që nuk na lejojnë të bëjmë hapin e rëndësishëm. Mbetet një paraqitje e mirë, por mund të ktheheshim në shtëpi me një sodisfaksion të cilin e kishim merituar.
Sot të gjithë janë përtej të mjaftueshmes si vlerësim, se kanë bërë mirë. Por nuk mund të dënoj këta djem që kanë shpenzuar energji. Edhe në aspektin taktik i mbyllëm mirë dhe kemi bërë një paraqitje të mirë. Kemi disa episode që na dënojnë përtej normales. Sot meritonim të merrnim barazimin se Spanja është një skuadër e madhe. Po rritemi, por nuk bëjmë hapin se na mungon diçka më shumë që të përmirësohemi, ka gjithmonë ndonjë gabim që ndodh dhe nuk duhet të bëhet. Për të qenë konkurrues nuk duhen bërë, por për fat të keq ndodhin dhe më vjen shumë keq për djemtë.
Ndoshta na mungoi pak mbajtja e topit, se ata janë agresive dhe nuk të japin kohë, të shpejtosh pasimin duhet të kesh teknkë, por nuk të japin kohë të marrësh frymë me 3-4 lojtarë që të sulmojnë. Ne patëm ndonjë nisje me Brojën në pjesën e parë, me disa mundësi më të mira pasimi, kishim një rast tjetër. Nuk mund të prisnim më shumë, të gjithë punuan shumë mirë, nuk mund t’u them djemve gjë. Por vëmendja duhet të jetë jo në 90 minuta, por në 100. Kur mungon një minutë, nuk mund të pësosh këtë gol, duhet ndërgjegjësim më shumë. Në minuta të fundit dihet që ka mjegullsi, por aty shihen skuadrat. Kjo duhet përmirësuar, për pjesën tjetër ishin përtej të mjaftueshmes”, tha Reja.
