Dy persona janë arrestuar në Krujë nga policia, që njofton se ka zbuluar 2 ‘shtëpi bari’.
Janë sekuestruar 17.1 kilogramë kanabis (7.6 kg në formë çokollate) dhe 156 fidanë kanabis, të kultivuar në vazo e kubikë.
Policia njoftoi se aksioni i koduar “Led 2”, i kryer nga DVP Durrës, në bashkëpunim me Drejtorinë Rajonale të AMP Durrës, erdhi pas informacioneve në rrugë operative se në fshatin Derven-Krujë, disa shtetas posedonin ambiente (banesa), të përshtatura për kultivimin e bimëve narkotike.
Si rezultat i këtij operacioni u arrestuan, në flagrancë, shtetasit:
- P., 53 vjeç, banues në Bushnesh,Krujë,
- L., 26 vjeç, banues në Derven, Krujë.
- Gjithashtu, u shpall në kërkim shtetasi N.L., 35 vjeç, banues në Derven, Krujë.
Sipas të njëjtave burime: Gjatë kontrollit të ushtruar në banesat e shtetasve Gj.P. dhe N.L., shërbimet e Policisë, kanë konstauar 2 ambiente të përshtatura për kultivim të bimëve narkotike, me anë të llambave. Gjithashtu, shërbimet e Policisë gjetën e sekuestruan lëndë narkotike, fidanë e pajisje elektrike që shërbenin për kultivim të bimëve narkotike.
“Vijon puna për kapjen e shtetasit N.L., si dhe për identifikimin dhe kapjen e personave të tjerë të përfshirë në këtë veprimtari kriminale. Materialet i kaluan për hetime të mëtejshme Prokurorisë pranë Gjykatës së Rrethit Gjyqësor Krujë, për veprat penale ‘Prodhimi dhe shitja e narkotikëve’ dhe ‘Kultivimi i bimëve narkotike’, të kryera në bashkëpunim”, mbyllet njoftimi i policisë.
