Ish-Kryeministri Sali Berisha iu drejtua me një mesazh demokratëve që të bashkohen, ndërsa tha se ky është momenti jo vetëm i bashkimit, por edhe i ri-organizimit të Partisë Demokratike.
Berisha tha se Gjykata sot legjitimoi të gjitha vendimet e Kuvendit të 11 dhjetorit, ndërsa tha se sot PD ka një statut të një Kuvendi më të pashembullt në historinë e saj dhe të Europës, të mbledhur nga anëtarësia.
Ish-Kryeministri tha se i kishte shtrënguar duart kryetarit të Grupit Parlamentar, Enkelejd Alibeaj dhe deputetin Gazment Bardhi, ndërsa i kishte kërkuar angazhimin dhe kontributin e tyre dhe të çdo demokrati.
“I gjeta të preokupuar në këtë proces, por diferencat në mendime ekzistojnë. Është në detyrimin e të gjithë drejtuesve aktualë të dialogojnë, debatojnë dhe diskutojnë në Grupin Parlamentar të PD. Komisioni i Rithemelimit ka besim të plotë te Grupi Parlamentar i kësaj partie dhe mesazhi më i mirë është normalizimi i plotë i jetës së këtij grupi, jo vetëm për riorganizimin dhe bashkimin e PD, por edhe në jetën e vendit”, tha Berisha.
Ish-Kreministri deklaroi se pjesë e Grupit Parlamentar është edhe Lulzim Basha, të cilit do i shtrëngoja dorën pavarësisht divergjencave që kam pasur me të.
Berisha tha se mbetet i hapur për të diskutuar me çdo demokrat dhe çdo demokrate, që kërkon dhe synon bashkimin, pavarësisht mendimeve të ndryshme. “Ne nuk largojmë dhe përjashtojmë askënd”, tha Berisha.
