Enkelejd Alibeaj, i komanduar nga Gazment Bardhi si Kryetar i PD, u shpreh në një konferencë për mediat, se selia e PD u vizitua nga persona të paftuar.
Bardhi tha se ndaj vendimit të Gjykatës do të ketë një ankimim në Apel, por edhe do të depozitohet një kallëzim penal ndaj gjyqtarit për shpërdorim detyre.
Duke dhënë versionin e tij lidhur me bisedën që ka pasur me z. Berisha, Alibeaj tha se “PD, 30 vjet pas formimit të saj, nuk mund të mbrojë interesat e demokratëve, duke mbajtur brenda saj, individë, deputetë, që janë shpallur “non grata” nga Shtetet e Bashkuara të Amerikës”.
“Duhet të gjejmë gjuhën e bashkimit, duhet të vendosim interesin e demokratëve të parin, të bashkohemi, të bëhemi shumicë dhe të rrëzojmë regjimin e Edi Ramës, të cilin nuk mund ta rrëzojmë duke përdorur metoda komuniste dhe duke pasur individë me të shkuar komuniste”, tha Alibeaj, duke dhënë detajet lidhur me bisedën që ka pasur me Berishën.
Ai tha se i ka kërkuar z. Berisha që të shohim nga e ardhmja, duke shtuar se i ka kërkuar që të tërhiqet, ashtu sikundër bëri Lulzim Basha. Sipas tij, PD do të përballet me sanksione nga SHBA nëse një non grata do të jetë në krye të PD, apo pjesë e saj.
“Ne nuk mund të përballemi me një regjim si ky i Edi Ramës, duke pasur kundra Shtetet e Bashkuara të Amerikës”, tha Alibeaj, duke shtuar se po kërkohet një akt simetrik, sikundër bëri z. Basha, duhet të bëjë edhe z. Berisha.
