Deputeti demokrat Ervin Salianji, ka përjashtuar mundësinë e një rikthimi të Lulzim Bashës në krye të PD. Ai tha në “Radari Informativ” në Abc se nëse Basha do të kishte në plan të kandidonte për kreun e PD ky do të ishte një turpërim për të.
“Palët duhet të nisin sa më parë negociatat, por më parë duhet ngritur një komision për përfaqësimin e të dyja palëve.
Në PD u kërkua nga ne dorëheqja e Bashës në raport me zgjedhjet dhe betejën e pabërë. Tani duhet të kemi dhe një tërheqje nga Komisioni i Rithemelimit”, u shpreh Salianji.
Pjesë nga diskutimi:
A duhet të kandidojë sërish Lulzim Basha?
Salianji: Në logjikën time Jo. Me aq sa kam punuar me të, këshilla ime do të ishte se ky është turpërim.
Sali Berisha në krye të PD, a e shihni si kryeministër?
Salianji: Unë po e them edhe njëherë se është momenti për bashkim, por mendoj se zoti Berisha duhet t’i lërë hapësirë dikujt tjetër që të çojë partinë përpara.
