Herdi Prenga është një tjetër lojtar i rikthyer në kombëtare. Ishte Panucci që e katapultoi 4 vite më parë me kombëtaren A dhe sot mbrojtësi i Kisvarda në Hungari shprehu të gjithë emocionet për bashkimin me lojtarët kuqezi.
“Kam qenë në kombëtare para katër vitesh kur ishte trajner Panuci, jam i kënaqur që jam sërish me çunat. Falenderoj trajnerin për ftesën, do të jap maksimumin dhe do të mundohem t’i ndihmoj. Minutat që kam pasur në Hungari më kanë ndihmuar të jem në kombëtare sepse jam paraqitur mirë aty. Mbrojtja kuqezi? Gjimshiti, Kumbulla dhe Ismajli janë lojtarë që luajnë në një nga kampionatet më të fortë, kanë eksperiencë, kualitet dhe mund të mësoj shumë nga ata. Unë do të jap maksimumin në stërvitje, e vendos trajneri sa minuta do të më japë”.
27-vjeçari foli dhe për ndryshimin mes Panuccit me të cilin ka punuar dhe trajnerit aktual Reja teksa u shpreh i kënaqur me formën që po kalon në Hungari.
“Nuk ka qenë e lehtë për mua. Panuci dhe Reja kanë pak ndryshime. Atmosfera është shumë e mirë, stërvitjet janë pak të ndryshme në anën teknike, por secili trajner ka stilin e vet. Te Kisvarda ndihem shumë mirë, e kam gjetur veten aty. Ekipi është i mirë dhe rezultatet janë shumë të mira. Kam qenë mirë dhe shpresoj të vazhdoj ashtu dhe të shohim çfarë do të ndodhë. Për merkaton duhet pritur fundi i sezonit, unë do të jap më të mirën dhe të shohim çfarë do të ndodhë”, deklaroi mbrojtësi kuqezi në fjalën e tij në konferencën e dhënë nga grumbullimi në Spanjë.
