Kjo e Mërkurë shënon ditën e 28-të të luftës në Ukrainë.
Luftimet e ashpra po vazhdojnë në qendër të qytetit-port Mariupol – në jug të Ukrainë, i cili është nën një bombardim intensiv rus. Qeveria ukrainase thotë se rreth 100,000 civilë janë bllokuar atje pa ushqim, ujë apo ngrohje.
Presidenti i Ukrainës, Volodymyr Zelensky tha se pavarësisht gjithë vështirësive, 7026 banorë të Mariupolit u shpëtuan të Martën.
Ushtria e Ukrainës pretendon se trupat ruse janë “të demoralizuara” dhe zyrtarët rusë tani po përpiqen të rekrutojnë ish-ushtarë për t’iu bashkuar luftimeve.
Zëdhënësi i presidentit rus Vladimir Putin, Dmitry Peskov, ka refuzuar të përjashtojë përdorimin e armëve bërthamore. Në një intervistë për CNN, Peskov tha se kjo mund të ndodhë nëse vendi përballet me një kërcënim ekzistencial.
SHBA e cilësoi deklaratën si të pamatur, me Pentagonin që deklaroi se “nuk është mënyra se si duhet të veprojë një fuqi bërthamore e përgjegjshme”.
Pentagoni tha gjithashtu se forcat ukrainase po arrijnë të rimarrin tokën nga trupat pushtuese ruse, veçanërisht në jug të vendit.
Në frontin diplomatik, Zelensky i ka përshkruar bisedimet me Rusinë si konfrontuese, por tha se, hap pas hapi, ato po ecin përpara.
