Anëtari i Këshillit Kombëtar të PD, Andi Mustafaj, shprehet se e vetmja mënyrë për të zgjidhur krizën në PD, është vota.
Në një intervistë për Syri Tv, Mustafaj është i mendimit se grupi i Bashës po i vendos kushte demokracisë dhe kjo është e papranueshme.
“Nuk mund t’i vihen kushte demokracisë, ne duam të votojmë. Nuk duam që një grup njerëzish të mbyllur brenda selisë së bravave që sot është e blinduar, këta persona t’i vendosin kushte demoracisë. Të hapin zgjedhjet për kryetar partie”, tha Mustafaj.
Anëtari i Këshillit Kombëtar të PD deklaroi se Basha thotë që ka dhënë dorëheqjen por po të ndjekësh veprimet e personave që e rrethojnë, kuptojmë që kemi të bëjmë me një truk.
“Ai është shkarkuar nga Kuvendi por ai nuk ka dhënë një dorëheqje të vërtetë, një skenar, një truk. Ka lënë një ekip që të vazhdojë blindimi i partisë.”-deklaroi Mustafaj.
Më tej ai shtoi se fjalimi i Bashës ishte në vijë të drejtë me atë që ka bërë ai nga 9 shtatori, ditë kur përjashtoi Berishën nga grupi parlamentar i PD.
“Më vjen keq për ata që ndoqën Bashën në një rrugë pa krye. Ka refuzuar të ballafaqohet me shumicën. Retorika e Bashës është klasike e një humbësi. Për të mos pranuar humbjen, vazhdon dhe zhytet më thellë në gënjeshtra dhe në një mit që ka krijuar me mendjen e vet”, tha Mustafaj.
