Ministrja e Energjisë dhe Insfrastrukturës, Belinda Balluku, tha se energjia nuk do të mungojë për qytetarët.
“Qeveria ka marrë përsipër që të mbulojë shpenzimet e shtuara për shkak të importit për biznesin e vogël. Ne do të vazhdojmë të mbështesim këto biznese.
Pavarësisht kushteve të motit, ne do të vazhdojmë të mos hasim mungesa në energjinë elektrike”, tha Balluku.
Ajo tha se kjo është një kohë kur për shkak të nivelit të kaskadës në Fierzë, do të importohet energji elektrike.
“Po kursejmë energjinë te ndriçimi rrugor, te ndriçimi i shesheve dhe ndërtesave publike”, tha Balluku, duke shtuar se në një situatë të tillë edhe qytetarët duhet të kursejnë.
Ajo ripërsëriti edhe njëherë se familjet shqiptare dhe biznesi i vogël do të jenë të mbrojtura nga çmimi i energjisë. Ndërkohë theksoi se pritet që situata të përmirësohet në kaskadën e Drini, pasi ditët e ardhshme priten shira.
“Kushte të mira ne konsiderojmë kur të kemi shira në kaskadën e Drinit. Menaxhimi i KEESH ka qenë persistent, është menaxhuar situata mirë. Të gjitha të dhënat që drejtori i KEESH sapo dha tregojnë qartë se kjo situatë po menaxhohet, e gjithë ndërmarrja e KEESH është në krye të detyrës.
Ajo që ne garantojmë dhe është e rëndësishme që ta themi është se energjia nuk do të mungojë për qytetarët, qeveria ka marrë përsipër që të mbulojë shpenzimet e shtuara për familjarët dhe biznesin e vogël, kemi mbrojtur dhe 7 mijë për biznesin e mesëm. Çfarë drejtori tha më sipër tregon dhe njëherë të gjithë angazhimin tonë për të ofruar energji pa ndërprerje”, tha Balluku.
