Edhe Giacomo Vrioni foli në konferencën për shtyp nga grumbullimi në Spanjë. Përpara miqësores së parë, sulmuesi kuqezi që po bën mirë me Tirol në Bundesligën Austriake shprehet i lumtur për thirrjen nga Reja teksa e pranoi se konkurrenca është e madhe por si kudo në çdo ekip.
“Jam i lumtur kur Kombëtarja të thërret pasi është një gjë e bukur, përfaqëson familjen dhe popullin tënd. Do të jap maksimumin. Kombëtarja sipas meje është shumë pozitive sepse skuadra është në një nivel të lartë. Kemi shumë lojtarë të mirë dhe është një gjë shumë e bukur të jem këtu në Kombëtare. Konkurenca? Është normale që konkurrenca është gjithandej. Është një gjë më e bukur për Shqipërinë nëse të gjithë sulmuesit shënojnë. Ne do japim maksimumin, por zgjedhjen do ta bëjë trajneri Ky është objektivi i gjithë lojtarëve që të jenë pjesë e Kombëtares. Të shënoj gol me Kombëtaren është ëndërr ime, të gjej golin e parë me Kombëtaren. Mund të bëj të lumtur gjithë familjen time”.
Për të ardhmen me Juventusin që mban kartonin e tij, Vrioni nuk jep sinjale të qarta teksa ka një mesazh edhe për ish shokun e skuadrës te bardhezinjtë, Alvaro Morata.
“Nuk e di për të ardhmen me të thënë të vërtetën pasi mungojnë akoma 2 muaj dhe sezoni është i gjatë. Shpresoj të mbaroj sezonin duke shënuar më shumë gola dhe duke i dhënë ndihmë ekipit tim. Me disa lojtarë mbaj, kontakte kam disa shokë aty. Mbaj kontakte me Alvaro Moratën. Mesazh për të? Jo sepse jemi profesionistë. I kam thënë të më ruajë një bluzë. Është një çun shumë i mirë dhe për mua është ndër sulmuesit më të mirë në botë. Me Spanjën, ne do provojmë pasi është normale, me ndeshjen me Spanjën mund të shohim nivelin që jemi dhe të tentojmë të marrim maksimumin. Dhe për tifozët që do vijnë në stadium”, deklaroi sulmuesi kuqezi në fjalën e tij.
