Në Shqipëri, rreth 320 mijë shpendë të ngordhur ditët e fundit. Kështu njoftoi zv.ministrja e Bujqësisë, Ermira Gjeci gjatë një konference për mediat.
Duke folur për gripin e shpendëve – që deri më tani është konfirmuar vetëm në Durrës dhe sipas autoriteteve është një rast i izoluar, ajo u shpreh se nuk transmetohet te konsumatori.
“Bëjmë me dije publikun se në vijim të zbatimit të Urdhrit “Për miratimin e planit të kontigjencës së sëmundjes së influencës aviare”, po respektohet dhe po zbatohet me përpikëri çdo pikë e këtij plani. Vijon procesi i eliminimit të shpendëve të sëmurë e asgjësimi i tyre në njësitë e konfirmuara të prodhimit nga laboratori i referencës ISUV për prani të influencës aviare. Deri tani kanë ngordhur rreth 340 mijë (338426) shpendë. Procesi i groposjes vazhdon me ritme të shpejta brenda rregullave dhe konform legjislacionit në fuqi. Procesi është dinamik dhe lëviz në varësi të rasteve të reja. Gjithashtu, ka nisur procesi i asgjësimit edhe i 120 mijë shpendëve të cilët ndodhen në të njëjtat kapanone dhe bateri për të shmangur çdo rrezik të mundshëm duke ndjekur planin e kontigjencës”, tha ajo.
Gjeci shtoi se po respektohen procedurat e shuarjes së vatrës, po kryhet tamponimi i zonës sipas niveleve të rrezes, po komunikohet risku për fermerët dhe veterinerët e zonës dhe është siguruar baza materiale e ajo mbrojtëse për veterinerët.
“Vijon monitorimi i terrenit në të gjithë Shqipërinë si në pikat e inspektimit kufitar, në bazë të planit të kontigjencës, ashtu edhe në përmbushje të mobilizimit për monitorim dhe kontroll për garantimin e sigurisë ushqimore për produktet e nxjerra në treg. Shërbimi veterinar rajonal është prezent çdo ditë në komplekse duke mbikëqyrur në mënyrë rigoroze zbatimin e masave të biosigurisë dhe dezinfektimin e mjeteve të transportit. Shërbimi veterinar po kryen dhe survejance sindromike në të gjithë fermat që mbarështojnë shpendë si dhe po marrin kampione në të gjithë kapanonet e subjektit për të vërtetuar praninë ose mungesën e sëmundjeve”, u shpreh më tej.
Ajo apeloi që fermat që konstatojnë problematika për shpendë të ngordhur në fermë, veçse duhet të bëjnë karantinim të menjëhershëm për shmangie përhapjeje, duhet të kontaktojnë Shërbimin Veterinar nëpërmjet numrit të gjelbër 0800 3366.
“Jemi në gatishmëri dhe bëjmë me dije se Autoriteti Kombëtar i Ushqimit është në terren me një plan veprimi të fokusuar tek shpendaria në njësitë tregtare dhe gjithë zinxhirin ushqimor për të garantuar gjithë produktet dhe nënproduktet me origjinë shpendore”, shtoi.
