“Blof taktik për ti hedhur hi syve demokratëve”, e ka cilvsuar deputeti Flamur Noka largimin e Lulzim Bashës nga zyra që mbante peng që nga data 11 dhjetor 2021 kur demokratët e shkarkuan nga funksionet partiake.
Në një intervistë në Faxnews, Noka tha se Basha ishte një peng i Edi Ramës dhe mbajti peng PD dhe vullnetin e demokratëve.
“Ajo që është për tu vlerësuar është fakti se pjesa më e madhe e deputetëve demokratë ka reflektuar dhe ka kuptuar se Basha ishte peng i Ramës.
Bashkim me kushte nuk ka, kush janë këta që flasin për bashkim me kushte? Kush është Enkelejd Alibeaj që flet në emër të PD, pasi ai është thjesht vetëm një deputet, sikundër edhe unë”, tha Noka.
Sipas tij, edhe fakti që Basha shkoi sot në zyrë tregon se ai me atë që paraqiti dje si dorëheqje është thjesht një blof taktik.
“I vetmi institucion që përfaqëson PD është Komisioni i Rithemelimit, që u mandatuan nga Kuvendi Kombëtar i 11 dhjetorit. Enkeled Alibeaj, Gazment Bardhi, Jorida Tabaku janë të shkarkuar ashtu si edhe Lulzim Basha. Ata thjesht po bëjnë lojën e Bashës në shërbim të Ramës, duke mbajtur peng demokratët”, tha Noka.
Ai tha se Berisha do të nisë një tur takimesh në rrethe në kuadër të asaj që do të quhet turi i bashkimit të demokratëve.
