Deputeti Flamur Noka, anëtar i Komisionit të Rithemelimit, u pyet sot se kur do të shkohet në selinë e PD, pas dorëheqjes së Lulzim Bashës, ndërsa ai nuk dha ndonjë afat, por sqaroi se Edi Rama mund të mbajë peng shtëpinë e demokratëve edhe disa kohë, duke përdorur Lulzim Bashën dhe adjutantët e tij, Enkejed Alibeaj, Jorida Tabaku dhe Gazment Bardhi.
Noka tha se tashmë fokusi i Komisionit të Rithemelimit është te organizimi i partisë, bashkimi i demokratëve.
“Ne do të nisim një tur takimesh për bashkimin e demokratëve. Ish-Kryeministri sali Berisha do të nisë turin tjetër të takimeve në rrethe, pasi ne synojmë bashkimin, pa përjashtuar askënd”, tha Noka.
Ai u pyet nëse kanë nisur negociatat mes Komisionit të Rithemelimit dhe PD zyrtare, ndërsa u shpreh se nuk ka negociata, pasi adjutantët e Lulzim Bashës nuk e duan bashkimin përderisa vijojnë të bëjnë lojën e Edi Ramës.
“Nuk ka negociata, nuk mund të ketë kur vendosin kushte, të cilat i artikulojnë 3 adjutantët e Lulit. Demokratët tashmë e kanë kuptuar se kjo është loja e pengjeve të Edi Ramës”, tha Noka në Faxnews.
