Mbretëria e Bashkuar i ka ofruar forcave ukrainase mbi 4 mijë sisteme raketore antitank për të ndihmuar Kievin në rezistencën kundër agresionit rus.
Ministria e Mbrojtjes e Ukrainës thotë se pajisjet që do nisen nga Anglia janë NLAW (Armë të Lehta Anti-Tanke të Gjeneratës së ardhshme).
Ndërkohë presidenti amerikan, Joe Biden pritet të bëjë një vizitë në Evropë për të zhvilluar një takim të jashtëzakonshëm të NAT0-s, që synon të ulë tensionet nga konflikti në Ukrainë dhe t’i vendosë sanksione të tjera Rusisë, për ta bërë këtë vend të paguajë një kosto më lartë për sulmin ndaj fqinjit të saj perëndimor. Vendet evropiane janë të shqetësuara se konflikti mund të përhapet në territorin e tyre.
Korrespondentja e Zërit të Amerikës pranë Shtëpisë së Bardhë Anita Powell dhe korrespondenti Bill Gallo në Seul raportojnë se presidenti Joe Biden shkon në Evropë të mërkurën me shpresën se bisedimet ballë për ballë me udhëheqësit e NATO-s, ata evropianë dhe të G7-ës, do të arrijnë atë që diplomacia virtuale nuk ka arritur deri më tani: t’i japë fund sulmit rus të Ukrainës.
