Situatë shqetësuese në Durrës si pasojë e ngordhjes masive të shpendëve.
Në ambientet e jashtme të një stabilimentit në Xhafzotaj, prej më shumë se pesë ditësh, pulat e ngordhura vijojnë të qëndrojnë aty.
Përfaqësues të dy subjekteve thonë se kanë pësuar dëm të madh financiar me ngordhjen e rreth 1 milionë pulave. Sipas tyre, situata është kritike edhe për shkak të një përhapje të mundshme të ndonjë sëmundje te njerëzit, duke qenë se nga Ministria e Bujqësisë nuk është marrë asnjë masë për asgjësimin e pulave të ngordhura.
Apeli i tyre i drejtohet institucioneve që të gjendet një vend i përshtatshëm për eliminimin e pulave të ngordhura, por edhe të shfarosen shpendët e gjallë në kapanone, të prekura nga sëmundje.
Ditët e fundit, në disa pulari në Durrës, por edhe qytete të tjera ka pasur ngordhje masive të pulave. Ministria e Bujqësisë raportoi më 17 Mars se u konstatua se shpendët ishin prekur nga “laringotrakeiti infektiv” – që nuk transmetohet te njerëzit.
Konfirmohet gripi i shpendëve
Ndërkohë, një ditë më parë, Ministria e Bujqësisë konfirmoi rastin e parë të gripit të shpendëve në një stabiliment në Durrës.
Sipas Ministrisë, “hetimi epidemiologjik deri më sot flet për rast të izoluar”.
Ministria e Bujqësisë thekson se “nuk ka prova epidemiologjike se ky virus mund të transmetohet tek njerëzit përmes ushqimit, shpendëve e vezëve”.
Prokuroria nis hetimet
Nga ana tjetër, edhe prokuroria e rrethor ka nisur hetimet
Burime pranë prokurorisë së Durrësit njoftuan se organi i akuzës ka regjistruar procedim penal për ngordhjen e shpendëve në Durrës, “lidhur me procedurën e ndjekur që nga rasti i parë”.
Prokuroria ka nisur hetimet për këtë çështje, ditën e djeshme, ndërsa sot kanë nisur veprimet e para hetimore, shtuan të njëjtat burime.
