Pas dorëheqjes nga posti i Kryetarit të PD, vendim që e paraqiti në një mbledhje të përbashkët të Grupit Parlamentar, Kolegjit të Kryetarëve dhe Kryesisë, Lulzim Basha mësohet se ka mbledhur në një darkë disa nga mbështetësit e tij.
Nuk dihet nëse kjo është një darkë falenderimi nga ana e Bashës për disa nga Kryetarët e emëruar në krye të degëve, apo është një mbledhje informale, për të caktuar hapat e mëtejshëm të grupimit që përfaqëson Lulzim Basha.
Mësohet se Basha dhe mbështetësit e tij janë mbledhur në një restorant shumë afër selisë së PD, ndërkohë që pjesa e mbetur e Grupit Parlamentar, vijoi mbledhjen në seli, ku paraqitën edhe një rezolutë drejtuar deputetëve që më parë ishin përjashtuar dhe që janë anëtarë të Komisionit të Rithemelimit.
Kushti që deputetët e mbetur në PD e drejtuar deri më sot nga Lulzim Basha për bashkimin është distancimi i Sali Berishës nga ky proces, gjë që duket e papranueshme pasi vetë ish-Kryeministri ka deklaruar se gjithçka do bazohet te vota.
