Edhe Kombëtarja shqiptare U-19 ka zbritur në fushë prej ditës së sotme, duke nisur kështu grumbullimin në kuadër të dy ndeshjeve miqësore ndaj Kosovës U-19.
I gjithë grupi është bërë bashkë, teksa kanë zhvilluar edhe seancën e parë stërvitore nën drejtimin e Armando Cungut dhe stafit kuqezi.
Ndërkaq, Departamenti i Komunikimit në FSHF bën me dije se ka pasur një ndryshim të fundit ne listën e ekipit Kombëtar U-19, me sulmuesin e Internacionalit, Melsi Cereni, i cili nuk do të jetë pjesë e këtij grumbullimi për shkak të një dëmtimi të pësuar përgjatë kësaj fundjave.
Kësisoj, trajneri Cungu ka vendosur të thërrasë lojtarin e Partizanit, Erik Gjokën, i cili është vënë menjëherë nën urdhrat e tij dhe stafit, teksa ka qenë edhe pjesë e seancës së parë stërvitore.
Ekipit kombëtar U-19 do të zhvillojë dy ndeshje miqësore ndaj Kosovës U-19 më 26 dhe 28 mars në Shqipëri.
Ndeshja e parë do të luhet në stadiumin “Egnatia Arena”, në Rrogozhinë, në ora 15:00 më 26 mars, teksa dy ditë më vonë, në po të njëjtin stadium do të zhvillohet edhe sfida e dytë mes këtyre dy përfaqësueseve në ora 10:00.
