Eksperti Eduard Elezi u shpreh se ka një keqmenaxhim të theksuar në sektorin e energjisë elektrike nga Qeveria. Ai tha se kemi blerë shtrenjtë dhe kemi shitur lirë në të njëjtën kohë energjinë elektrike.
Ai theksoi se s’ka asnjë prononcim nga Enti Rregullator, ndërsa shtoi se kemi një abuzim 190 milionë euro me çmimin e energjisë.
“Ka një keqmenaxhim. KESH ka shitur dhe ka zbrazuar të gjithë kaskadën dhe OSHEE ka blerë. Diferenca ka qenë mbi 100 euro për megavat. KESH ka shitur me 50, OSHEE ka blerë me 180-200 euro në kohë të njëjtë. S’ka asnjë prononcim nga enti rregullator. Kemi abuzim 190 milionë euro me çmimin e energjisë. Të ketë transparencë nga operimi i kompanive”, tha Elezi.
Eksperti theksoi se enti rregullator është në dijeni të gjithë situatës ndërsa shtoi se s’ka transparencë.
“KESH-i të plotësojë nevojat vendase. Është keqmenaxhuar në mënyrë drastike, këtu nuk merret vesh ku shkuan 200 milionë kredi sovrane të shtetit shqiptar. Po të kishin blerë energji në tetor-nëntor kur çmimet ishin më të ulëta, do kishim një situatë jo si tani”, tha Elezi.
Eksperti deklaroi se ka gabime nga prononcimi i ministres Balluku dhe kjo vjen nga mosnjohja totale e situatës nga ana e saj.
“Po të isha eprori i saj, do ta kisha shkarkuar, jo dorëheqje, do e shkarkoja. Duket se ajo prononcohet se do ndërpres energjinë rrugëve natën. Energjia natën është e lirë, shteti shqiptar ka marrëveshje edhe me Kosovën.”-tha Elezi.
Elezi është i mendimit se sektori i energjisë elektrike është në kolaps.
“Nëse vazhdon të menaxhohet kështu situata do jetë katastrofike. Jemi në kolaps.”-tha Elezi.
