Në vendin tonë janë konfirmuar rastet e para me Gripin e Shpendëve.
Teksa tek qytetarët është rritur frika për konsumimin e mishit, ekspertët bëjnë thirrje për qetësi.
‘’Shumë kujdes dhe aspak panik. Iu bëj thirrje prindërve që të mos lejojnë fëmijët të luajnë me shpendët, duke qenë se ata janë më të ndjeshëm ndaj virozave’’,- tha për A2CNN profesori Kristaq Bërxholi.
Sipas tij, konsumimi i shpendëve dhe produkteve të tyre nuk është i rrezikshëm, nëse ato gatuhen mirë.
“Nuk ka përse të ketë panik. Dëmi ekonomik nuk është i vogël kur ky virus hyn në stabilimente. Ky virus dëmton deri në 80% të shpendëve. Njerëz të mos kenë frikë, pasi deri tani nuk prek njerëzit, lëre pastaj të kalojë nga njeriu te njeriu. Njerëzit duhet të jenë të vëmendshëm sidomos ata që merren me shpendët. Nëse shohin shpendë të ngordhura duhet të kontaktojnë me autoritetet e shërbimit veterinar. Fëmijët duhet të mos i lejojmë të luajnë as me rosat, as me patat dhe as me gjelat e detit. Të mos ketë panik, por shërbimi veterinar është i angazhuar në nivelin maksimal. Kjo gjë pritej pasi Europa ka vite me këtë lloj virusi. E rëndësishme është që hyri në komplekse, kjo do të thotë që ato kanë ulur nivelin e survejancës. Shpendi duhet të përgatitet mirë. Nuk duhet të mbahet bashkë mish i pagatuar, me gjellën e bërë gati. Edhe për vezët ka një hezitim. Duhet të kemi parasysh se edhe nëse virusi kalon te vezët nuk përbëjnë rrezik. Ato duhet të zihen mirë”, tha Bërxholi.
