Ish-Kryeministri Sali Berisha u shpreh mesditën e sotme se Shqipëria po qeveriset nga një Qeveri e papërgjegjshme, që ka ndalur kohën dhe nuk ka integruar vendin në BE.
Në bashkëbisedimin e zhvilluar në kuadrin e “Foltores” me shqiptarët që jetojnë në Greqi, Berisha tha se sot shqiptarët kanë rrogat më të ulëta krahasuar me vendet e Rajonit, ndërsa Edi Rama mbjell dëshpërim dhe zhgënjim, vret shpresën e shqiptarëve, të cilët mbajnë vendin e parë për emigracionin.
“Në 4 vitet e fundit janë larguar 520 mijë shqiptarë, kryesisht të rinj. Bandat, droga dhe krimi bëjnë ligjin. Zgjedhjet dhe vota e lirë janë përjashtuar nga shoqëria. Lulzim Basha imitojë modelin e shëmtuar të Edi Ramës, i cili fshiu zgjedhjet nga Partia Socialiste që prej vitit 2009”, tha Berisha.
Ai shtoi se tashmë është ndërmarrë nisma për rithemelimin e PD-së, me synimin krijimin e opozitës së vërtetë, jo asaj fasadë të Lulzim Bashës.
“Zhvillimi më pozitiv i Shqipërisë është pikërisht rithemelimi i opozitës së vërtetë”, tha Berisha, duke shtuar se ajo po zgjon shpresën e shqiptarëve.
Duke u ndalur te zgjedhjet e 6 marsit, ish-Kryeministri deklaroi se ata dëshmuan qartë para shqiptarëve, opozitën e vërtetë të vendit, edhe pse logon e PD e mbajnë peng Lulzim Basha me ndihmën e Edi Ramës.
“Duhet ta pranojmë që PD kaloi një krizë të vërtetë, e cila përbën edhe sfidën më të madhe për ne, për kapërcimin e saj. Ndaj ne kemi dalë me motivin të bashkohemi të gjithë përmes votës së lirë”, tha Berisha. Sipas tij, pa rikthimin e votës së lirë, PD nuk mund të jetë një forcë demokratike.
“Misioni i PD është një mision historik, duhet të shpëtojmë shoqërinë shqiptare nga një regjim i cili nuk është demokratik. Ky regjim i Ramës ndjek vetëm interesin e pasurimit të tij dhe ministrave, ku korrupsioni dhe arroganca janë kudo”, tha Berisha.
