Trajneri i Tiranës, Orges Shehi, ka deklaruar se është i kënaqur me pikët e skuadrës së tij që vazhdon të marshojë drejt titullit kampion. Por në “Gol pas Goli” ai përsëriti mendimin e tij se nuk duhej folur që tani për titullin.
“Ishte ndeshje e sikletshme për pozicionin që ka kundërshtari dhe individët që ka brenda. Kur vjen fundi, spektakli është në plan të dytë. Në pjesën e parë kishim raste por edhe kundërshtarët, se u zgjatëm pak, por në këto ndeshje janë vendimtare episodet.
Kishim informacion dhe dinim si mund të rreshtohej Dinamo, por nuk dinim si do dilnin në sulm. Ne na del për detyrë të shohim se çfarë bën trajneri i ri i kundërshtarit dhe në pjesën e dytë realizuam atë që deshëm, se kishte hapësirë mes Sofranac dhe Samake dhe e realizuam. Nuk është se e realizuam shpesh, por kur e bëmë na doli pozitive.
Në ndeshjet derbi, episodet janë të rëndësishme, të tre rezultatet janë në konturin e lojës dhe kur kundërshtari ka penallti, mund të kompromentohet ndeshja. Ishte fundi, mund të na vinte në siklet e barazohej, por Visari më vjen mirë që është në formë.
Nuk e pashë penalltinë nga pozicioni ku isha dhe kur VAR po merrte vendim mendoja se mos ka ndonjë dyluftim trup më trup, apo karton. Por pastaj mësova që kërkohej për penallti. Janë gabime njerëzore që i bëjnë të gjithë, që nga unë i pari.
Kundërshtari na kapi nga krahu i majtë, për vonesë në presion, keqkuptim mes Tolit dhe Hoxhallarit. Na vunë në vështirësi me lojtarë të shpejtë në krah. Pastaj kur kundërshtari luan me dy sulmues të deklaruar dhe Ibraimin pas tyre, morëm masat duke luajtur me 5 për të mos i lënë qendërmbrojtësit një kundër një. Kemi marrë masat dhe është thelbësore që të kemi superioritet numerik.
Është në strategjitë e klubit që të rinjtë të marrin minuta dhe mendoj se edhe Gjumsin duhet ta aktivizoja pak më shpejt, të fitonte besim pas asaj ndeshje të një javë me parë. E futëm në fushë për t’i thënë që kemi besim dhe është pjesë e skuadrës. Janë edhe 30 pikë në lojë por duke parë distancën, mund t’i japim minuta. Shumica e lojtarëve janë të rinj dhe kanë marrë gjithmonë minuta dhe kanë qenë gjithmonë në fushë, Nuk mendoj se ka mbetur lojtar pa luajtur, por nuk mund të ndryshojmë fizionominë, të prishim manovrën duke futur shumë se mund t’i bëjmë dëm. Duhet të jenë të studiuara me pikatore, të marrin besim duke luajtur përkrah lojtarëve më të vjetër.
Sa i përket Taulantit, do të doja dhe mendoj se e meriton të jetë pjesë e përfaqësues në këto ndeshje. Ai është në listë pritje, me këto probleme janë shumë afër lojtarë të tillë. Të mos harrojmë që janë miqësore, besoj se në zyrtare do të jetë pjesë e kombëtares.
Sa i përket fjalës titull, kjo varet nga karakteri i njeriut dhe mënyra se si kërkon të implementojë gjërat. Nuk mund të themi se kemi dalë kampion kur nuk kemi dalë. Kur merresh me deklarata e eufori, atëherë skuadra fillon e ul impenjimin dhe fillon e dëmtohesh duke u futur në stres, kështu çdo gjë shkon për ters. Duke qenë në këto pozita e duke ngulur këmbët në tokë, do të kemi kohë për të festuar”, tha Shehi.
