Disa orë para mbajtjes së protestës së dytë kombëtare kundër rritjes së çmimeve, Qeveria ka njoftuar ngritjen e Bordit për monitorimin e çmimeve të produkteve të shportës.
Njoftimi u bë nga ministrja e Financave, Delina Ibrahimaj, sipas të cilit ky bord nuk do të lejojë rritjen e çmimeve përtej lëvizjes së bursave.
“Disa nga tregtarët janë importues direkt, disa janë tregtues, disa paketues, pra është një proces kompleks, ndaj dhe ne do të monitorojmë të gjithë situatën dhe marzhet e fitimit”, tha Ibrahimaj. Sipas saj, disa nga importuesit kanë deklaruar se nuk do të kenë marzh fitimi, ndërsa të tjerë kanë deklaruar se do të kenë marzhe fitimi minimale.
“Ne nuk mund të kontrollojmë çmimet, pasi kjo varet nga tregjet ndërkombëtare, nga rritja e inflacionit në tregjet ndërkombëtare, ndaj dhe ne nuk mund të vendosim ato çmime që do të dëshironim”, tha Ibrahimaj.
Gjithsesi Ibrahimaj ka pranuar se ka pasur raste kur ka një spekulim lidhur me çmimet e disa produkteve, pasi nuk na rezultojnë të ndikuara nga bursat apo inflacioni i çmimeve ndërkombëtare.
