Detaje të reja bëhen me dije nga hetimet lidhur me grupin e goditur në Itali që merrej me trafik grogë – e sipas hetuesve pjesë të cilit ishte dhe këngëtarja shqiptare Elsa Lila.
Sipas raportimeve gjatë kësaj të Premteje në mediat italiane, arrestimet e para erdhën në pranverën e vitit 2019, periudhë kur hetimet u zhvilluan duke përdorur përgjime, video-përgjime dhe ndjekje të personave të dyshuar.
Sasia totale e drogës së sekuestruar gjatë fazave të ndryshme të hetimit raportohet se është 5 kilogramë kokainë, 43 kilogramë marihuanë dhe 82 kilogramë hashash.
Pjesëtarët e grupit
Gjykata e Romës ka vendosur masën e sigurimit arrest me burg pa afat për 13 persona (tetë shqiptarë dhe gjashtë romakë):
- Arind Boci i njohur si Rindi (35 vjeç)
- Glend Burhanaj i njohur si Qorri (32 vjeç)
- Fabrizio Capogna (37 vjeç)
- Petrit Bardhi i njohur Titi (47 vjeç)
- Fantozzi Gianluca (51 vjeç)
- Leonard Vacaj (48 vjeç)
- Simone Laurenti (42 vjeç)
- Elsa Lila (40 vjeçe)
- Gjino Lleshaj (39 vjeç)
- Manolo Monterisi (44 vjeç)
- Alessio Nardini (47 vjeç)
- Francesk Ndreka i njohur si Cesk (28 vjeç)
- Manuela Rizzo (46 vjeçe)
Raportohet se 17 persona janë të akuzuar në këtë dosje hetime, ndërsa dosja e çuar në gjykatë nga hetuesit përbehet nga 197 faqe.
Bosët
Sipas hetimeve, drejtues të grupit ishin Arind Boci – Rindi, së bashku me Glend Burhanajn – Qorrin. Ata dyshohet se “krijuan, organizonin dhe menaxhonin trafikun e drogës në zonat Acilia dhe Primavalle, duke koordinuar vendosjen, fshehjen, përpunimin dhe tregtimin të kokainës, hashashit dhe marihuanës“. Francesk Ndreka – Çesk, ishte “njeri i besuar dhe krahu operativ” i Arind Bocit.
Boksieri Petrit Bardhi – Titi dyshohet se “ka siguruar kontaktet e blerësve të lëndës narkotike duke u mbështetur në kalibrin dhe njohuritë e tij me subjekte të shquar të krimit romak si dhe duke e ndihmuar atë (Rindin) me rastin e dorëzimit të substancës narkotike”.
Këngëtarja Elsa Lila akuzohet se ishte kujdestare dhe llogaritare e të ardhurave.
Alessio Nardini “siguronte disponueshmërinë e banesës dhe garazhit (në zona Torrevecchia) e përdorur për mbajtjen e drogës”.
Samitet në bare
Bashkëpunëtorët, sipas prokurorisë, takoheshin rregullisht për “samite” në lokalin me vendndodhje në Acilia dhe një tjetër lokal që “konsiderohej strategjik për organizatën” edhe “për shkak të bashkëpunimit të pronarit, L.E., 50 vjeç, i dënuar më herët për vepra që lidhen me narkotikët”.
Edhe pse emri i këtij të fundit është në fashikujt e Antimafias, ai nuk është arrestuar.
