Ish-ministri Arben Imami deklaroi në emisionin ‘Çim Peka Live’ në Syri Tv se Lulzim Basha duhet të largohet. Imami tha se Lulzim Basha është bërë barrë e rëndë për të gjithë në Partinë Demokratike.
“Duhet të largohet dhe do largohet. Çështje ditësh besoj largimi i tij se është bërë barrë e rëndë për të gjithë ata që e mbanin. Nëse deri më 6 mars Basha mendohej si zgjidhje, nuk e di se për çfarë, pas 6 marsit ai është pjesë e problemit. Humbja ishte e rëndë dhe paralajmëron humbje të tjera shumë më të rënda”, tha Imami.
Ish-ministri deklaroi më tej se njerëz shumë të afërt të Bashës që e kanë mbështetur janë ngritur duke i kërkuar dorëheqjen. Imami e konsideroi Lulzim Bashën një kukull të Edi Ramës.
Sipas Imamit problemi nuk qëndron se a do të largohet Basha, sepse kjo është çështje e mbyllur
“10 deputetë që janë bashkuar me Foltoren. 12 deri në 14 deputetë të cilët, duke filluar nga sekretari te nënkryetarët, grup i cili kërkon largimin e Bashës por me kusht edhe moskandidimin e Berishës. Një pjesë e madhe do e kishin të vështirë të qëndronin më mbrapa”, tha Imami.
Sakaq, Arben Imami u shpreh se një zhvillim është që largohet Basha dhe i hapet rruga procesit të zgjedhjeve që nisi me kongresin e 11 dhjetorit.
“Berisha do kandidojë dhe do fitojë. Grupi që nuk kanë qenë thjeshtë të dëmshëm, por me qëllim kanë dëmtuar demokracinë, do jetë e vështirë të gjejnë vendin e tyre në një Parti Demokratike të bashakuar”, tha Imami.
