Shtëpia e yllit të Manchester United Paul Pogba u grabit ndërsa dy fëmijët e tij ishin në dhomat e tyre duke fjetur.
Vetë francezi ndodhej në “Old Trafford” në takimin e raundit të 16-ve të Ligës së Kampioneve kundër Atletico Madridit. Mesfushori e quajti këtë episod si makthin e tij më të madh, ndërkohë që theksoi se hajdutët i kishin marrë atë që kishte më shumë vlerë se gjithçka, sigurinë.
Lojtari 29-vjeçar ka ofruar një shpërblim për këdo që mund t’i japë atij informacion për personat që e vodhën. Grabitja ndodhi në minutat e fundit të sfidës, ndërsa hajdutët qëndruan në banesë për rreth pesë minuta.
Ky është një tjetër episod që do të ndikojë të ardhmen e mefushorit francez. Kontrata e tij mbaron në 30 Qershorin e ardhshëm dhe 29-vjeçari nuk ka pranuar që të rinovojë. Duket se ai do të largohet për herë të dytë në karrierën e tij nga “Djajtë e kuq”. Dy nga klubet e interesuara për shërbimet e tij janë Juventusi dhe PSG-ja.
