Ministrja e Energjitikës, Belinda Balluku, u shpreh mbrëmjen e sotme në Opinion, se sasia e rezervave shtetërore të produkteve ushqimore është sekret.
“Të dhënat për rezervat e shtetit janë sekretim, nuk mund ti themi në publik. Por ajo që mund të them është se qytetarët duhet të jenë të qetë, pasi ne do e përballojmë këtë krizë, ashtu siç kemi bërë edhe me pandeminë”, tha Balluku.
Ajo tha se rezervat mund të mbahen ose brenda territorit, ose në një vend tjetër, psh në Maqedoninë e Veriut. “Të gjitha kompanitë kanë detyrim ligjor që të kenë rezervat e tyre të naftës, që konsiderohen rezerva shtetërore, që ata i mbajnë në depozitat e tyre. Kjo është njv situatë e kornizuar ligjërisht. Rezervat ushqimore quhen sekrete sepse kanë të bëjnë me sovranitetin e vendit”, tha Balluku.
Ndërkohë ministrja e Financave, Delina Ibrahimaj, tha se çmimet do të vijojnë të rriten, pasi rriten në bursa. “Jo vetëm në Shqipëri, por edhe në vende të tjera do të ketë rritje çmimesh, pasi gjithçka kuotohet në bursa”, tha Ibrahimaj.
Ajo paralajmëroi se pas ngritjes së bordeve që do të monitorojnë çmimet, do të ngrihet edhe një Task Force, që do të kontrollojë çdo element, që përfshin si cilësinë ashtu edhe peshën, në rastin e bukës.
“Në vendet e Rajonit kemi një rritje çmimesh që në 6 mujorin e dytë, për shkak të inflacionit, ndërsa në Shqipëri kemi një rritje në dy javët e fundit,them këtu për ushqimet”, tha Ibrahimaj.
