Presidenti ukrainas Volodymyr Zelensky mori duartrokitje të vazhdueshme nga ligjvënësit e Shteteve të Bashkuara përpara fjalimit të tij virtual në Kongresin Amerikan.
Ai po u drejtohet anëtarëve tani, me një mesazh për mbështetjen e deritanishme që është dhënë, por dhe me atë që pret shteti i tij në ditët e ardhshme. Zelensky hapi fjalimin e tij në Kongres duke lavdëruar trimërinë e popullit ukrainas dhe duke thënë se “fati” i vendit të tij po vendoset pikërisht tani në mes të pushtimit të Rusisë.
Kryeqyteti Kiev është “nën sulme raketore dhe ajrore nga trupat ruse çdo ditë. Por ai nuk dorëzohet”, tha Zelensky, duke iu drejtuar Kongresit virtualisht, përmes një përkthyesi. Ai tha se vendi i tij është “në luftën më të keqe që nga Lufta e Dytë Botërore”.
“Kam nderin t’ju përshëndes në emër të popullit ukrainas, popullit të guximshëm dhe liridashës, i cili për tetë vjet i reziston agresionit rus,” tha ai. “Ata që japin djemtë dhe vajzat e tyre më të mira për të ndaluar këtë pushtim rus në shkallë të gjerë”.
“Tani për tani, fati i vendit tonë është duke u vendosur. Fati i popullit tonë ku ukrainasit do të jenë të lirë, nëse ata do të jenë në gjendje të ruajnë demokracinë e tyre. Rusia ka sulmuar jo vetëm ne, jo vetëm tokën tonë, jo vetëm qytetet tona, ajo shkoi në një ofensivë brutale kundër vlerave tona, vlerave themelore njerëzore”, tha ai.
Presidenti i SHBA Joe Biden planifikon të detajojë ndihmën e SHBA për Ukrainën në një fjalim të tij më vonë gjatë ditës së sotme.
