Gjykata e Elbasanit ka dënuar me 18 vite burg Sokol Sanxhaktarin, dhëndrin e ish-kryebashkiakut të Elbasanit Qazim Sejdini, i cili akuzohet bashkë me 3 të tjerë për vrasjen e shokut të tyre.
Me 18 vite burgim u dënua Ardiano Hajdari, i cili ashti si Sanxhaktari u shpall fajtor për “Vrasje me dashje në bashkëpunim”. Ndërkohë, Amadeus dhe Mehmet Muça u dënuan me 5 vite burgim secili, për moskallëzim krimi e veprime që pengojnë zbulimin e së vërtetës.
Në pretencë, Prokuroria kërkoi 20 vite burg për Sanxhaktarin. I njëjti dënim u kërkua dhe për Hajdarin.
Vrasja ndodhi në 30 korrik të viti 2020 në orën 4 të mëngjesit, kur Sanxhaktari, Hajdari dhe Florian Lamçja ndodheshin në një lokal në Elbasan duke konsumuar pije alkoolike dhe nargjile. Sipas hetimeve, Florian Lamçja gjeti vdekjen si pasojë e goditjeve të shumta në kokë karrige në kokë. Veç dëmtimeve të shumta në fytyrë, kishte një të çarë me mjet prerës në parakrahun e dorës së djathtë. Dy të akuzuarit, pas arrestimit nga policia, kanë thënë se ishin të dehur dhe nuk mbajnë mend çfarë ndodhur.
Sokol Sanxhaktari, dhëndri i ish-kryetarit të Bashkisë Qazim Sejdini është vënë disa herë në prangat e policisë për vepra të ndryshme penale.
Më 9 qershor 2008, Sokol Sanxhaktari është dënuar nga gjykata e Elbasanit për veprat penale të “Shkatërimit të pronës” dhe “Prishjes së rendit dhe sigurisë publike”.
Më 1 korrik 2008, Sanxhaktari është dënuar nga gjykata e rrethit Elbasan me 3.4 milion lekë gjobë, për akuzën e kundërshtimit të forcave të rendit.
Më 29 qershor 2010 Sanxhaktari është dënuar me 3 muaj e 10 ditë burg për armëmbajtje pa lejë dhe plagosje të lehtë.
Më datën 31 tetor 2010 është dënuar me 6 muaj burg për akuzën e “Armëmbajtjes pa lejë” dhe “Kundërshtim të forcave të rendit”.
Më datën 4 prill 2016 Sanxhaktari është dënuar me 1 vit burgim për armbëmbajtje pa leje dhe kundërshtim të forcave të rendit.
Ai ka qenë i dyshuar dhe për ngjarje të tjera të ndodhura në Elbasan.
