SHÇBA ka reaguar pasi një efektiv i Gardës së Republikës kanosi me armë zjarri një grup banorësh protestues në Paskuqan.
SHÇBA thotë se po verifikon rastin dhe do të marrë masa pasi rrethanat e ngjarjes të jenë zbardhur.
Gjatë pasdites u raportua se Euglen Benga, efektiv në Gardën e Republikës, dhe truprojë e Kryeparlamentares Lindita Nikolli, u përfshi në një incident pasi nga banorë të Paskuqanit pretendohet se ai ka nxjerrë një armë zjarri dhe i ka kërcënuar, ndërsa ata kishin bllokuar rrugën se po protestonin.
Njoftimi
Pas publikimit në media të pamjeve ku shfaqet një punonjës i Gardës së Republikës që ka nxjerrë armën e shërbimit gjatë një proteste në zonën e Paskuqanit, Shërbimi për Çështjet e Brendshme dhe Ankesat (Agjencia e Mbikëqyrjes Policore) ka nisur verifikimet për nxjerrjen e përgjegjësive dhe zbardhjen e plotë të rrethanave të ngjarjes.
SHÇBA (AMP) mbetet e përkushtuar në misionin e saj për garantimin e zbatimit të ligjit dhe falënderon mediat dhe qytetarët për kontributin.
