Këngëtarja Elsa Lila raportohet se është nën hetim nga autoritetet italiane. Sipas mediave italiane, policia ka goditur një grup që merrej me trafik droge në Jug të Romës, ndërsa mes personave nën hetim raportohet se është edhe këngëtarja e njohur Elsa Lila, e cila jeton prej vitesh në shtetin fqinjë.
Siç shkruan “Il Messaggero”, mëngjesin e sotëm, efektivët e policisë kanë nisur një aksion për ekzekutimin e 13 masave të arrestit me burg kërkuar nga Prokuroria Antimafia e Romës dhe miratuar nga gjykata, për vepra penale që lidhen me trafikun e drogës.
Referuar të njëjtin burim, subjekt i aksionit janë edhe shqiptarët që njihen si të afërt me klanin “Guarnera”: Boksieri Petrit Bardhi, i njohur si Titi, Arben Zogu i njohur si Rikardino, Orial Kola. “Mes personave nën hetim është edhe këngëtarja shqiptare Lila Elsa”, shkruan “Il Messaggero”.
Emri i Petrit Bardhit – Titi – është regjistruar me herët edhe në një tjetër hetim të bujshëm të autoriteteve italiane. Bëhet fjalë për aksionin “Criminal Games” që pak vite më parë goditi një grup kriminal që mërej me trafik droge dhe zhvatje.
