Futbollisti rus Artem Dzyuba ka refuzuar thirrjen për në ekipin kombëtar për arsye familjare.
“Nuk iu bashkova kombëtares ruse për shkak të çështjeve politike. Bëhet fjalë për arsye familjare, por nuk dua të hyj në detaje”, tha Dzyuba, kapiteni dhe një ndër lojtarët më të mirë të Rusisë, për të përditshmen ruse “Sport-Express”.
“Më duket se ka pasur një keqkuptim. Trajneri Valery Georgievich Karpin më keqkuptoi ose fjalët e tij u keqinterpretuan”, tha sulmuesi i skuadrës ”Zenit”.
Më herët të martën, trajneri i kombëtares ruse Karpin tha në faqen e internetit të Federatës ruse të Futbollit se kishte folur në telefon me Dzyuban të dielën dhe se 33-vjeçari kërkoi të mos ftohej në kampin stërvitor të Rusisë për shkak të situatës së vështirë në Ukrainë, ku jetojnë shumë nga të afërmit e tij.
“Patëm një bisedë të mirë, vendosëm të mos e përzgjedhim atë, por do të qëndrojmë në kontakt dhe do të monitorojmë ecurinë e tij në klub”, shtoi Karpin.
Ish-sulmuesi i ”Spartak”-ut, Dzyuba ka shënuar 107 gola në 240 paraqitje për ”Zenit”-in.
Për kombëtaren ruse, ai regjistroi 55 ndeshje ndërkombëtare duke shënuar 30 gola.
Dzyuba është aktualisht golashënuesi më i mirë i Rusisë, së bashku me Aleksandr Kerzhakov, i cili u tërhoq nga futbolli në 2017.
