Kryeministri Edi Rama, ka publikuar faturën e energjisë elektrike të një qytetari shqiptar që jeton në Firence të Italisë, si përgjigje për protestuesit që kërkojnë uljen e çmimeve në vend.
Në faturën e publikuar nga Rama, shqiptari që jeton në Firence thekson se ka paguar 600 euro energji elektrike, edhe pse në Itali rrogat që marrin janë 1500 euro.
Prej disa ditësh Rama po përdor çmimin e energjisë si një kundërpeshë ndaj protestave qytetare, ndërsa hera herës fut në panik qytetarët për atë që mund të vijë në muajt në vijim.
Postimi i Ramës:
Ma çon një shqiptar nga Firenze (emrin e të cilit e fshiva edhe pse nuk ma kërkon), me këtë tekst:
“Zoti Kryeministër!
E kotë të luftosh në fejsbuk me ata që një e dy përmendin rrogat tona këtej. Nuk e besova kur ju dëgjova që në Shqipëri nuk e keni rritur faturën e elektricitetit. Po e verifikova dhe ju them që jam pa fjalë! Mos u mërzisni me ata që bëjnë llogaritë e rrogave tona jashtë. Ca nuk kanë, ca nuk dinë ca jane te futur, ruani qetësinë me ta kush nuk e kupton sot do e kuptojë nesër. Ne këtej po na ikën truri me faturat e energjisë. Italianëve edhe më keq se neve që jemi stërvitur ca andej para se të vinim.
Po ju nis faturën e famijes time mund ta tregoni publikisht. Jetojmë në një apartament aspak luksoz me qera këtu me një nga ato rrogat 1500 euro që i shkruajnë komentet sikur janë 15 mijë euro! Kemi tre goca në shkollë. Nuk po i bie gjatë. S’dimë sa do arrimë ta kapim fundin e muajve që vijnë po vazhdoi kjo furtunë çmimesh.. Zoti ju dhëntë durim dhe forcë”.
