Superliga e basketbollit të meshkujve ka zhvilluar të shtunën dhe të dielën ndeshjet e javës së 13-të për sezonin e rregullt. Teuta, Vllaznia dhe Tirana kanë marrë fitoret e radhës në kampionat.
TEUTA-DINAMO – Ashtu sikurse pritej, kampionët në fuqi nuk falën në shtëpi dhe triumfuan me rezultatin e thellë 104-76 përballë Dinamos së vendit të fundit.
Ndeshja e zhvilluar të shtunën në “Ramazan Njala” u dominua nga durrsakët që nga fillimi e deri në fund. Teuta i futi “turbon” që në start, teksa e fitoi periodën e parë 30-15.
Duke triumfuar 26-19 në çerekun e dytë, bregdetarët e Melzin Lazimit shkuan në pushimin mes dy pjesëve me avantazhin e përgjithshëm 56-34. Gjysma e dytë e ndeshjes ishte më shumë një formalitet për vendësit, të cilët e kontrolluan pa shumë problem lojën.
Pesë lojtarë të Teutës prekën kuotë dyshifrore pikës, ndërsa shënuesi më i mirë ishte Frenki Lilaj me 18. Abdel Gjyzeli, me 21 pikë ishte shënuesi më i mirë i ndeshjes, por pikët e kapitenit nuk shërbyen për ta shmangur disfatën e Dinamos.
VLLAZNIA-KAMZA – Sfida e luajtur në pallatin e sportit “Qazim Dervishi”, siç parashikohej ishte më e luftuara e javës. Vllaznia arriti që të thyente Kamzën me rezultatin 87-83.
Shkodranët e bënë diferencën në periodën e fundit, duke realizuar edhe përmbysjen e madhe. Kështu, perioda e parë shkoi në favor të Vllaznisë në shifrat 20-16.
Por Kamza reagoi mjaft mirë në periodat pasardhëse, të cilat i fitoi 24-27 dhe 16-25, duke marrë avantazhin 60-68 pas gjysmë ore lojë. Por në 10- minutëshin e fundit, kuqeblutë u treguan të papërmbajtshëm dhe triumfuan 27-15, për të finalizuar përmbysjen.
Butler, me 25 pikë udhëhoqi Vllazninë në këtë sukses. Për Kamzën nuk mjaftoi paraqitja e shkëlqyer e kapitenit Niko Thano, autor i 30 pikëve dhe 5 kërcimeve.
PARTIZANI-TIRANA – Java e 13-të uli siparin me derbin e zhvilluar dje në “Asllan Rusi”. Tirana tregon edhe një herë se prej shumë vitesh është ajo që bën ligjin në kryeqytet për sportin e koshit.
Bardheblutë e Erkand Karajit triumfuan me rezultatin 68-84.
Pas një periode të parë të luftuar, të cilën Tirana e fitoi minimalisht 22-23, në çerekun e dytë bardheblutë e rritën ndjeshëm nivelin lojës, duke triumfuar thellë 15-29, për të kryesuar 37-52 pas gjysmës së takimit.
Dy periodat e tjera ishin më të ekuilibruara, me Tiranën që e menaxhon mjaft mirë avantazhin, duke marrë suksesin e radhës në derbi.
Për bardheblutë spikatën Endrit Hysenagolli me 20 pikë dhe 9 kërcime si dhe amerikani Smith me 21 pikë. Për “demat” e Erdal Borovës, më rezultativët në derbi ishin kapiteni Mired Jani me 24 pikë, Henson me 19 dhe Prodani me 15.
/Panorama sport/
