Lulzim Basha ka thirrur një mbledhje të Kolegjit të Kryetarëve, një ditë pasi Grupi Parlaentar demokrat i kërkoi të largohet nga partia, për ti hapura rrugën bashkimit të demokratëve.
Basha është konsideruar nga deputetët, mbështetës të tij, deri me 6 mars, si barrë për PD-në, dhe si pengesa kryesore për bashkimin e demokratëve.
Mbledhja e Kolegjit të Kryetarëve ka nisur në këto momente në selinë e PD. Kjo strukturë deri më tani ka mbështetur Bashën në qëndrimet e tij, madje në mbledhjen e fundit, të pranishmit kanë sulmuar disa nga deputetët që kanë shfaqur kritika të forta ndaj tij. Nuk dihet nëse edhe në mbledhjen e sotme, Kolegji do të mbështesë Bashën, ashtu sikundër ka bërë deri më tani, apo edhe drejtuesit e degëve, shumica e të cilëve janë të emëruar, kanë ndryshuar mendje.
Pas humbjes në zgjedhjet e 6 marsit, ku logoja e PD për herë të parë që prej krijimit 31 vite më parë, doli forcë e tretë politike, presioni ndaj Bashës është shtuar, ndërsa tashmë janë edhe ata që e mbështetën që i kërkojnë largimin.
