Presidenti i Serbisë, Aleksandar Vuçiç ka folur për deklaratat e fundit në Kosovë, që Serbia mund ta sulmojë Kosovën në kohën kur siguria evropiane po cenohet nga lufta në Ukrainë. Këto deklarata ai i ka quajtur hipokrizi, ndërkohë që përpjekja e Kosovës për anëtarësim në NATO vazhdon.
“Është hipokrizi, në Kosovë nuk bëjnë gjë tjetër përveçse thonë që Serbia do të sulmojë. Ata e dinë që fjala ime mjafton, por presionet vazhdojnë”, ka thënë Vuçiq për Prva TV. Vuçiç pretendon se një Serbi e dobët i konvenon Prishtinës, Podgoricës, Zagrebit dhe një pjesë të Sarajevës.
Presidenti serb ka thënë se disa shtete perëndimore po mundohen ta anëtarësojnë Kosovën në NATO, duke i bindur katër shtetet anëtare të saj që ta njohin fillimisht pavarësinë e Kosovës, për t’i hapur rrugë procesit të anëtarësimit.
Madje, sipas Vuçiç, përpjekja për futjen e Kosovës në NATO është konfirmuar edhe nga ish-zëdhënësi i NATO-s, Jamie Shea, i cili ka deklaruar së fundmi se anëtarësimi i Kosovës në NATO është i mundshëm.
Duke folur për televizionin, Vuçiç ka thënë se asgjë më nuk është e njëjtë që nga plasja e luftës në Ukrainë. Nuk dihet çfarë sjell e ardhmja, ka thënë ai.
