Lulzim Basha i është shmangur pyetjeve të gazetarëve këtë të Shtunë, para se të futej në selinë e PD-së, ku zhvillohet një mbledhje e grupit parlamentar.
Gazetarët i ‘zunë pusi’ në hyrje të selisë, ku Basha mbajti një prononcim. Ai hodhi akuza ndaj Ramës dhe qeverisë lidhur me rritjen e çmimeve dhe kujtoi masat që propozoi më herët për tu ardhur në ndihmë qytetarëve dhe biznesit.
Ai tha se mbështet protestat që po zhvillohen, ndërsa shtoi se pavarësisht situatës së brendshme, “ne se harrojmë detyrën tonë para njerëzve, demokratët do jenë në krye të betejës për jetën e qytetarëve, krizën e tmerrshme që po kalojnë, ndërkohe qeveria shton dhunën ndaj qytetarëve”.
Ai tha po ashtu se ”një nga propozimet që do ti parashtroj grupit parlamentar është që të kërkojnë mocion me debat në parlament sa më shpejt të jetë e mundur për të vënë para presionit maksimal qeverinë që të lërë fjalët dhe të merret me vepra”.
“Për çështjet e tjera do flas pas mbledhjes ë grupit parlamentar”, përfundoi Basha ligjërimin, duke ia mbathur prej gazetarëve dhe mos pranuar asnjë pyetje.
