Për të dytën ditë radhazi, çmimet e naftës në vend janë ulur. Këtë të Shtunë, çmimet kanë rënë deri në 10 lekë për Litër, duke u shitur në pikat e furnizimit të karburanteve me 216 – 225 Lekë për Litër.
Ulja e çmimit të naftës vjen pas tre ditëve protesta në disa qytete në vend, duke konfirmuar dyshimet se më shumë se çmimi i bursave, rritja e çmimit në vend është bërë nga spekulantë.
Pavarësisht protestave, qeveria nuk ka pranuar heqjen e taksave mbi naftën, që llogariten rreth 100 lekë për Litër, por ka marrë përsipër vendosjen e çmimit në bashkëpunim me tregtarët.
Edi Rama njoftoi dje ngritjen e një Bordi Kombëtar të Administrimit të Karburantit – një ent me përfaqësues të bizneseve të tregtimit të naftës dhe qeverisë – që siç shpjegoi kryeministri, do të bëjë transparencë dhe do të vendosë një çmim të unifikuar në treg. Në një reagim këtë të Shtunë, ai shkroi në FB “çmimet do të kalojnë në filtrin e transparencës dhe marzhi i fitimit të kompanive do të ngrijë, për të mos lejuar asnjë abuzim në kurriz të qytetarëve”. Mbledhja e parë është lajmëruar të zhvillohet ditën e sotme.
Ekspertë të fushës megjithatë, janë treguar skeptikë për nismën.
Parashikimet janë të zymta për të ardhmen, me çmimet në vend që vijojnë të rriten, nga produktet ushqimore e deri te mallrat e tjerë. Ndërkohë që këtë të Shtunë në orën 11:00, një protestë masive pritet para kryeministrisë.
/BN/
