Gazment Bardhi, në një prononcim për mediat, ka pohuar se në mbledhjen e Grupit Parlamentar të PD, ka kërkuar që Lulzim Basha të tërhiqet, por gjithashtu të tërhiqet edhe Sali Berisha.
“Duhet të tërhiqen të dy individët që kanë shkaktuar këtë problem, si Berisha ashtu edhe Basha. Mund të bashkohemi dhe të bëhemi alternativë qeverisëse, vetëm nëse tërhiqet Basha dhe Berisha”, tha Bardhi.
Ai tha se Basha u shpreh i gatshëm për tu bërë pjesë e zgjidhjes, duke kapërcyer veten dhe pozicionin e tij.
“Demokratët kanë nevojë për zgjidhje, zgjidhja vjen vetëm përmes bashkimit. Interesi i PD duhet të prevalojë mbi çdo interes personal. Basha iu vetëofrua Grupit Parlamentar për të qenë pjesë e zgjidhjes”, tha Bardhi. Sipas tij, krizën në PD e shkaktoi vendimmarrja e Bashës mbi fatin e Berishës, dhe kjo do të thotë se ata janë problem për PD, dhe duhet të tërhiqen për zgjidhjen e krizës.
