Kryeministri Edi Rama ka thumbuar nga Turqia protestuesit që kanë mbushur rrugët dhe sheshet në shumë qytete të vendit, përfshi edhe bulevardin “Dëshmorët e Kombit”.
“Për kë e njeh dorën e nongratave të shpallur e të pashpallur, këto protesta janë një përpjekje e ulët e të të njëjtave hije të së shkuares, për të manipuluar njerëzit duke hedhur gurin e fshehur dorën! Ky nuk është populli, po e njëjta pakicë e zhurmshme në kërkim të rrëmujës”, shkruan Rama.
Postimi i Ramës vjen në një kohë kur qytetarët po shprehin revoltën kundër tij, lidhur me rritjen e çmimeve, ndërsa Kryeministri po mundohet ta konsiderojë protestën si të manipuluar.
Në fakt është i njëjti Kryeministër që pak ditë më parë deklaronte se nuk kishte ndërmend të ndërhynte në çmimet e tregut, ndërsa i sugjeroi shqiptarëve të shtrëngonin dhëmbët dhe ta përballonin me dinjitet.
Por protestat e nisura duket se i kanë ndryshuar mendjen Ramës, i cili sot deklaroi se çmimet do të caktoheshin nga Komiteti i ngritur me përfaqësues të qeverisë dhe shoqatës së hidrokarbureve.
