Në pikat e tregtimit të miellit, për shkak se kërkesa është e lartë, ka nisur të ketë vështirësi në furnizim e për pasojë edhe të ketë mungesa.
Për shkak të rritjes së çmimit të grurit në bursë, por edhe problemeve me importin nga Rusia, një thes miell tani kushton më shtrenjtë.
“Ka qenë 17 mijë lekë, është bërë 19 mijë lekë thesi 25 kg”, u shpreh një tregtar.
Blerësit e rregullt në këtë pikë të tregtimit të miellit njoftohen nga tregtari me telefon, duke përcaktuar oraret që të mos shkaktohen radhë.
“E kemi zgjidhur edhe me anë të koordinimit që të mos bëhet rrëmujë”, tha ai më tej.
Qytetaret thonë se janë të vetëdijshëm se për shkak të krizës globale çmimet do të rriten, por për ta është e vështire t’i përballojnë qofte edhe tek produktet bazike si mielli.
Prej gati dy javësh pati panik tek qytetarët se nuk do të mund të kishte mungesë të miellit në treg. Kjo shkaktoi edhe radhë në pikat e tregtimit të miellit.
Rritet çmimi i bukës
Çmimi i bukës vazhdon të rritet. Pas rritjes se disa muajve më parë me 10 lekë, buka ka pësuar një rritje tjetër çmimi.
“Tani për momentin është rritur me 20 lekë edhe tendenca është në rritje sepse ne varemi gjithmonë nga mielli. Mielli është duke u rritur”, u shpreh pronari i një furrë buke.
Kjo situate ka detyruar blerësit të rendisin edhe bukën tek ushqimet që marrin me lista.
“Këto kohë ndjejmë shumë vështirësi, vijnë kërkojnë pa lekë. Ndihemi në siklet, nuk mund t’i kthejmë se është bukë”, tha ai më tek.
Në një vëzhgim në disa furra ne Tiranë, vihet re se çmimi i bukës është rritur me 20 deri në 30 lekë.
“E kemi ndjerë rritjen e çmimit të bukës. Brenda ditës është rritur 30 lekë”, tha një qytetare.
“Është rritur shumë, nga 20 lekë të gjitha”, u shpreh një e moshuar.
“Ka qenë 80 lekë, tani nëpër dyqanet e lagjes ka qenë 90, tani pothuajse është bërë 100-120. Po rritet edhe vazhdon rritja, presim akoma”, tha një grua.
/Euronews/
