Disa qindra qytetarë kanë dalë në protestën e thirrur para Kryeministrisë.
Kjo është dita e 3-të e protestës qytetare, ndërsa sot i janë bashkuar edhe studentët, të cilët në orët e paradites marshuan nga Universiteti Bujqësor deri në qendër të Tiranës.
Protesta zhvillohet kundër rritjes së çmimeve, përfshi edhe karburantet dhe produktet e shportës, ndërsa kërkohet nga Qeveria që të ndërhyjë me uljen e taksave dhe rritjen e pagave.
Godina e Kryeministrisë është rrethuar me kordone policie, ndërsa në zonën përreth godinës qeveritare ndodhet trupa të FNSH dhe atyre Shqiponja.
Nesër pritet që po në Tiranë të mbahet një protestë kombëtare, e cila do të nisë në sheshin Skënderbej dhe do të vijojë përgjatë bulevardit “Dëshmorët e Kombit”.
Në dy ditët e para protestuesit kanë bllokuar disa nga pikat kyçe të akseve rrugore në qendër të Tiranës, ndërsa policia ka ndërhyrë dhunshëm. Nuk dihet nëse sot do të ketë një precipitim të situatës, pra përsëritje të skenarëve të bllokimit të rrugëve, dhe protestuesit të shpërndahen dhunshëm nga Policia.
